Videodan kadr

Samarqand shahrida 1,6 mlrd soʻmlik tabiiy gazdan noqonuniy foydalanish holatlari aniqlandi, deb xabar bermoqda “Hududgaztaʼminot” AJ axborot xizmati.

Maʼlum qilinishicha, viloyat hududida Bosh prokuratura, gaz taʼminoti filiali komplayens nazorat tuzilmalari, shahar gaz taʼminoti boʻlimi xodimlari va “Oʻzenergoinspeksiya” hamkorligida olib borilgan tadbirlarda qator noqonuniy holatlar fosh etilgan.

Xususan, Samarqand shahar Spitamen shoh koʻchasida joylashgan koʻp qavatli uy xatlovdan oʻtkazilganda loyiha-texnik hujjatlarsiz, taʼminoti korxonasi bilan shartnoma rasmiylashtirmasdan tabiiy gazdan foydalanilayotgani aniqlangan. Holat yuzasidan 725 million 587 ming soʻmlik tabiiy gaz hajmlari qayta hisob-kitob qilingan.

Boshqa bir xuddi shunday holat shaharning “Nurli kelajak” MFYdagi koʻp qavatli uyda ham kuzatilgan. Mazkur qoidabuzarlik natijasida esa 702 mln 138 ming soʻm zarar keltirilgan.

Shuningdek, shaharning Narpay koʻchasidagi koʻp qavatli uyda ham yuqorida qayd etilgani kabi noqonuniy holat aniqlanib, qoidabuzarga nisbatan 184 mln 953 ming soʻm jarima belgilangan.

Bildirilishicha, hozirda barcha holatlar boʻyicha dalolatnomalar rasmiylashtirilib, hujjatlar huquq-tartibot organlariga yuborilgan.