Illyustrativ foto

Xitoyning “StarVision” kompaniyasi tomondan ishlab chiqilgan “Samarqand-2028” sunʼiy yoʻldoshi joriy yilning may oyida uchirilishi kutilmoqda. Bu haqda “Oʻzbekkosmos” agentligi matbuot xizmati maʼlum qildi.

Qayd etish joiz, 2025-yilning noyabr oyida “Oʻzbekkosmos” agentligi va “StarVision” kompaniyasi sunʼiy yoʻldosh texnologiyalari va kosmik ilovalarni rivojlantirish boʻyicha strategik memorandum imzolagan edi. Oʻshanda tomonlar qoʻshma loyihalarni amalga oshirish, ilmiy va texnologik integratsiyani kuchaytirish, universitetlar va kompaniyalar bilan hamkorlik qilishga kelishib olgandi.

Ahamiyatlisi, “StarVision” mazkur kelishuv doirasida oʻzining giperspektral sunʼiy yoʻldoshlaridan biriga “Samarqand-2028” nomini berishga rozi boʻlgan.

Joriy yilning 30-mart-1-aprel kunlari Toshkent shahrida oʻtgan “Space Technology Conference 2026” xalqaro anjumanida ushbu “Samarqand-2028” sunʼiy yoʻldoshi 2026-yilning may oyida fazoga uchirilishi kutilayotgani maʼlum qilindi.

“Mazkur loyiha oʻzaro hamkorlik doirasidagi eng muhim tashabbuslardan biridir”, deyiladi “Oʻzbekkosmos” xabarida.