Videodan kadr

Avvalroq Toshkent shahrida mast erkak avtomobil boshqarib, yoʻl-transport hodisasi sodir etgani, kamiga PPX xodimiga musht tushirgani haqida xabar berilgan edi. Oʻsha kuni vaziyatga aralashgan, mazkur shaxsning IIBda ishlovchi akasi lavozimidan ozod etildi.

Ichki ishlar vazirligi axborot xizmatining xabar qilishicha, bugun, 3-aprel kuni Sirdaryo viloyati Ichki ishlar boshqarmasida Vazir oʻrinbosari polkovnik Diyorbek Sattarov rahbarligida IIV tizimida qonuniylik va xizmat intizomini taʼminlash masalalariga bagʻishlangan navbatdagi yigʻilish oʻtkazilgan. Yigʻilishda sohada toʻplanib qolgan kamchilik va muammolar tanqidiy-huquqiy jihatdan tahlil etilgan.

Jumladan, joriy yil 2-aprel kuni ijtimoiy tarmoqlarda tarqalgan hamda jamoatchilikning haqli eʼtiroziga sabab boʻlgan holat — Sirdaryo viloyati IIB rahbar xodimi va uning yaqin qarindoshi ishtirokidagi huquqbuzarlik keskin muhokama qilingan.

Ushbu holat xizmat vakolatlarini suiisteʼmol qilish va mansab mavqeidan shaxsiy manfaatlar yoʻlida foydalanish ehtimolini koʻrsatuvchi salbiy holat sifatida huquqiy baholangan. Huquqbuzarlikka yoʻl qoʻygan podpolkovnik Sherzod Pardayev vazirlikning tegishli buyrugʻi bilan lavozimidan ozod etilgan.