Foto: SSV

Prezidentning 2025-yil 9-noyabrdagi “Tibbiyot va farmatsevtika xodimlarini qoʻllab-quvvatlash choralari toʻgʻrisida”gi qarori bilan 2026-yil 1-apreldan davlat tibbiyot muassasalarining ish vaqti rejimi 5 kunlik ish haftasiga oʻtkazildi.

Ushbu hujjat ijrosi doirasida kecha, 1-aprel kuni Sogʻliqni saqlash vazirligining tegishli buyrugʻi bilan Davlat tibbiyot muassasalarida besh kunlik ish haftasini tashkil etishning vaqtinchalik tartibi tasdiqlandi, deb xabar bermoqda vazirlik matbuot xizmati.

Unga koʻra 2026-yil 1-apreldan:

• tibbiyot xodimlari uchun haftalik ish vaqti 36 soatdan oshmaydi;

• zararli va xavfli sharoitlarda ishlovchilar uchun qisqartirilgan ish vaqti qoʻllaniladi;

• yuqori ruhiy va aqliy zoʻriqishli ishlar uchun ham 36 soatdan oshmaydi;

• tibbiyot xodimlari boʻlmaganlar uchun ish vaqti 40 soatni tashkil etadi.

Poliklinika va oilaviy shifokorlik punktlarida ish vaqti:

• dushanba–juma: 08:00–20:00;

• shanba: 08:00–14:00 (navbatchilik).

Sogʻliqni saqlashning yangi modeli joriy etilgan hududlarda:

• asosiy ish vaqti: 08:00–16:00;

• qoʻshimcha navbatchilik: 16:00–20:00.

Hujjatda shifo maskanlari faoliyatining uzluksizligini taʼminlash uchun bayram va dam olish kunlari navbatchilik asosida ishlash yoʻlga qoʻyilishi koʻzda tutilgan.

Navbatchilik vazirlikning 254-son buyrugʻi asosida amalga oshiriladi. Ish haqi saqlanadi, kamaytirilmaydi. Ichki hujjatlar va mehnat shartnomalari qayta rasmiylashtiriladi.

“Statsionarlarda navbatchilik doimiy tashkil etiladi. Smena va navbatchilik adolatli taqsimlanadi”, deyiladi SSV xabarida.