AQSHda Eronning Xarg oroliga maxsus kuchlar hamda anʼanaviy armiya boʻlinmalarini joylashtirish masalasi koʻrib chiqilmoqda. Bu haqida BILD nashri maʼlum qildi.

Bildirilishicha, mazkur operatsiya doirasida qoʻshinlarni Hoʻrmuz boʻgʻozi yaqinidagi qirgʻoq hududlariga ham joylashtirish ehtimoli mavjud. Maʼlumot uchun, Xarg oroli Fors koʻrfazining shimoliy qismida, qirgʻoqdan taxminan 30 kilometr, Hoʻrmuz boʻgʻozidan esa 500 kilometr atrofida uzoqlikda joylashgan. Ushbu orol Eronning asosiy neft terminallaridan biri hisoblanadi.

“The Washington Post” nashrining AQSH rasmiysiga tayanib xabar berishicha, prezident Donald Tramp hozircha quruqlik kuchlaridan foydalanishga ruxsat bermagan. Biroq operatsiyani rejalashtirish jarayoni faol davom etmoqda.

Ommaviy axborot vositalari maʼlumotlariga koʻra, AQSHda Fors koʻrfaziga qoʻshimcha 10 ming nafargacha harbiy xizmatchini yuborish imkoniyati ham koʻrib chiqilmoqda. Kyoln universiteti siyosatshunoslik professori Tomas Yegerning fikricha, AQSH allaqachon Eronning ayrim hududlarini nazoratga olish uchun quruqlikdagi kuchlardan foydalanish rejasini koʻrib chiqqan boʻlishi mumkin.