FIFA 2026-yilgi Jahon chempionatida qoʻllaniladigan yangi qoidalarni tasdiqladi. Bu haqda “The Referee” portali maʼlumot berdi. Unga koʻra, mundialda quyidagi qoidalar amal qiladi:

1. Agarda jamoa tarkibida oʻzgarish qilinsayu, bu 10 soniya ichida amalga oshirilmasa, yaʼni futbolchi 10 soniya ichida maydon ichidagi joyini boʻshatib bermasa, maydonga tushishi kerak boʻlgan futbolchi 1 daqiqadan keyin maydonga tushadi. Demak, jamoa 1 daqiqa mobaynida 10 kishi boʻlib, oʻyinni davom ettiradi.

2. Autdan yoki darvoza yonidan toʻpni oʻyinga kiritayotganda hakam tomonidan 5 soniyalik taymer sanaladi. Soniyalardan oshib ketilganda toʻp raqiblarga olib beriladi.

3. Maydonda tibbiy yordam olgan oʻyinchi maydonni tark etishi va qaytishdan oldin bir daqiqa kutishi kerak. Agarda jarohat olgan futbolchiga jarohat yetkazgan oʻyinchi kartochka oladigan boʻlsa, bu holat mustasno boʻladi.

4. VAR tizimi endi xato belgilangan burchak zarbalarini ham tekshirishi mumkin.

5. Faqatgina jamoa sardori qarorlar boʻyicha hakam bilan gaplashishi mumkin. Agarda boshqa futbolchilar hakam oldini oʻrab olishsa, ularga sariq kartochka koʻrsatiladi.