Foto: “Dunyo”

Oʻzbekistonning Hindistondagi elchisi Sardor Rustamboyev “Tejas Networks” kompaniyasi vitse-prezidenti Rajnish Khullar bilan uchrashdi. Bu haqda “Dunyo” axborot agentligi xabar qildi.

Qayd etilishicha, tomonlar Oʻzbekistonda ilgʻor telekommunikatsiya yechimlarini joriy etish istiqbollarini muhokama qilgan. Xususan, Rajnish Khullar Hindistondagi yirik loyihalarni amalga oshirish tajribasi, jumladan, “BSNL” davlat operatori uchun milliy 4G tarmogʻini yoyish va 250 mingdan ortiq qishloq aholi punktlarini yuqori tezlikdagi internetga ulash borasidagi maʼlumotlar bilan oʻrtoqlashgan.

Shuningdek, Hindiston tomoni Oʻzbekistonda qoʻshma loyihalarni amalga oshirishga katta qiziqish bildirgan. Hamkorlikning asosiy yoʻnalishlari sifatida “Tejas Networks” vitse-prezidenti “Oʻzbektelekom” AK bilan 5G aloqa standartlariga oʻtish, simsiz infratuzilmani rivojlantirish va mamlakatimizning qishloq hududlarini yuqori tezlikdagi internet bilan taʼminlash jarayonida oʻzaro hamkorlik qilishni taklif qilgan.

Bundan tashqari, tomonlar Oʻzbekiston hududida zamonaviy telekommunikatsiya uskunalarini ishlab chiqarishni tashkil etish imkoniyatlarini ham muhokama qilgan. Muloqot davomida ilgʻor telekommunikatsiya texnologiyalari sohasida malakali muhandislar tayyorlash masalasiga ham alohida toʻxtalib oʻtilgan.

Maʼlumot uchun, Hindistonning “Tata Group” konglomerati tarkibiga kiruvchi “Tejas Networks” telekommunikatsiya uskunalarini ishlab chiqaruvchi va loyihalovchi yetakchi kompaniyalardan biridir. Kompaniya Hindiston hukumatining “Make in India” dasturida faol ishtirok etib, aloqa operatorlari, internet-provayderlar, mudofaa va davlat sektorlari uchun yuqori texnologik mahsulotlar yetkazib beradi.

“Tejas Networks” telekommunikatsiya sohasidagi patentlar soni boʻyicha Hindistonda yetakchi hisoblanadi. Uning mahsulotlari 75 dan ortiq mamlakatga eksport qilinmoqda.

Raqamli tarmoqlar xavfsizligiga qoʻyiladigan talablar kuchayib borayotgan bir sharoitda, kompaniya oʻzini “ishonchli yetkazib beruvchi” sifatida namoyon etib, “Nokia”, “Ericsson”, “Huawei” kabi global ishtirokchilar bilan muvaffaqiyatli raqobatlashmoqda.