Foto: Surxondaryo viloyati IIB

Ijtimoiy tarmoqlarda Surxondaryo viloyatida ichki ishlar xodimlari va fuqarolar oʻrtasida janjal yuz bergani haqida xabarlar tarqaldi. Viloyat Ichki ishlar boshqarmasi mazkur holat yuzasidan maʼlumot berdi.

Aniqlanishicha, joriy yilning 2-fevral kuni Muzrabot tumani “Mehnatobod” mahallasida yashovchi, Jinoyat kodeksining 168-moddasi bilan ayblanuvchi tariqasida oʻtayotgan R.R. ismli ayolning uyiga 6 nafar erkak kelib, qarz masalasida janjal chiqargan hamda jamoat tartibi va fuqarolarning tinchligini buzgan.

Chaqiruv asosida voqea joyiga profilaktika inspektorlari yetib borib, janjal qilayotgan fuqarolar bilan tushuntirish ishlari olib borgan. Shundan soʻng ularni holatni rasmiylashtirish maqsadida tuman IIBga olib ketish jarayonida, 1972-yilda tugʻilgan Ch.X. xodimlarga keskin qarshilik koʻrsatib, profilaktika inspektori kapitan R. Choriyevning yuz qismiga boshi bilan zarba bergan.

Bu ham yetmagandek, javobgarlikdan qutulish maqsadida, Ch.X. oʻzini hushini yoʻqotganday koʻrsatib simulyatsiya qilgan. Ch.X.ni kasalxonaga olib borilib, sogʻligʻini tekshirish jarayonida, uning farzandi 2008-yilda tugʻilgan M.X. yetib kelib, profilaktika inspektori mayor E.Azamovga toʻsatdan hujum qilgan. U xodim tomonidan jismoniy kuch ishlatib, zararsizlantirilgan.

Bildirilishicha, hozirda holat yuzasidan Muzrabot tuman prokuraturasi tomonidan Jinoyat kodeksining 219-moddasi 2-qismi bilan jinoyat ishi qoʻzgʻatilib, fuqaro Ch.X.ga nisbatan “qamoq” tarzidagi ehtiyot chorasi qoʻllanilgan. Uning voyaga yetmagan oʻgʻli M.X.ga nisbatan qonunchilikka muvofiq tilxat ehtiyot chorasi belgilangan.