Eron Milliy xavfsizlik kengashi kotibi Ali Larijoniy 17-martga oʻtar kechasi Isroil hujumlari oqibatida halok boʻlgani maʼlum qilindi. Bu haqda “Times of Israel” nashri SAHAL bayonotiga tayanib xabar berdi.

Koʻp oʻtmay Isroil mudofaa vaziri Israel Kas Eronning “amaldagi rahbari” Ali Larijoniy zarba oqibatida halok boʻlganini tasdiqladi. Eron rasmiylari esa hozircha bu maʼlumot yuzasidan izoh bermagan.

Isroilning “12-kanal” telekanali xavfsizlik idorasidagi manbasiga tayanib xabar qilishicha, 16-mart kuni kunduzi Larijoniy Tehrondagi maxfiy kvartiralaridan biriga kelishi haqida maʼlumot olingan. Hujum vaqtida u oʻgʻli bilan birga ushbu manzilda boʻlgan. Manbaga koʻra, bunday zarbadan omon qolish imkonsiz.

Shuningdek, SAHAL Tehronda amalga oshirilgan “aniq nishonli zarba” natijasida “Basij” koʻngilli harbiylashtirilgan tuzilmasi qoʻmondoni Gʻolamrezo Sulaymoniy ham oʻldirilganini maʼlum qildi. “Basij” tashkiloti Eron Islom inqilobi muhofizlari korpusiga boʻysunadi va mamlakatdagi hukumatga qarshi namoyishlarni bostirishda ishtirok etishi bilan tanilgan.

Maʼlumotlarga koʻra, Ali Larijoniy Eron oliy rahbari Ali Xomanaiy halok boʻlganidan keyin oʻldirilgan eng yuqori lavozimli amaldor hisoblanadi.

“The New York Times” nashrining yozishicha, AQSH va Isroil hujumlaridan oldin Larijoniy amalda mamlakat rahbariga aylangan va unga namoyishlarni bostirish hamda ehtimoliy urushga tayyorgarlik koʻrish vazifasi yuklatilgan. Shuningdek, u Tehronning asosiy hamkorlari — Rossiya, Qatar va Ummon bilan aloqalarni muvofiqlashtirgan hamda AQSH bilan Eron yadro dasturi boʻyicha muzokaralarga masʼul boʻlgan.