Illyustrativ foto

Rossiyaning Rostov viloyatida yuz bergan baxtsiz hodisa oqibatida halok boʻlgan oʻzbekistonlikning jasadi Vatanga qaytarildi. Bu haqda “Dunyo” axborot agentligi xabar berdi.

Maʼlum qilinishicha, Rostov viloyati Bataysk shahridagi qurilish obyektlarida ishlab kelgan B.Y. uyida yongʻin chiqishi oqibatida voyaga yetmagan nabirasi X.A. halok boʻlgani va uni vatanga qaytarishda yordam soʻrab Oʻzbekiston Bosh konsulxonasiga murojaat qilgan.

Aniqlanishicha, ushbu baxtsiz hodisa oqibatida X.A.ning barcha hujjatlari yonib ketgan. Shu bois uning hujjatlarini qayta rasmiylashtirish hamda jasadni Oʻzbekistonga qaytarishda Rossiya tomoni bilan muammo paydo boʻlgan.

Bosh konsulxona mazkur holat yuzasidan zudlik bilan Rossiyaning vakolatli tibbiyot birlashmalari bilan muzokara olib borib, voyaga yetmagan oʻzbekistonlikning jasadini Vatanga tezkorlik bilan qaytarish chora-tadbirlarini amalga oshirgan.

Murojaatchi B.Y. nomiga Bosh konsulxona tomonidan vatanga qaytish guvohnomasi rasmiylashtirilib, Migratsiya agentligi jamgʻarmasi hisobidan X.A.ning jasadi “Uzbekistan Airways” kompaniyasining Krasnodar­­-Toshkent yoʻnalishi orqali Oʻzbekistonga qaytarilgan.