Nurafshon shahrida 8 tonna isteʼmolga yaroqsiz spirtning muomalaga kiritilishining oldi olindi. Bu haqida Iqtisodiy jinoyatlarga qarshi kurashish departamenti xabar berdi.

Unda aytilishicha, Bosh prokuratura huzuridagi Departamentning Nurafshon shahri boʻlimi va boshqa huquqni muhofaza qiluvchi organ xodimlari hamkorligida tezkor tadbir oʻtkazilgan.

Aniqlanishicha, 3 nafar fuqaro oʻzaro til biriktirib, fuqaro M.X.ga 2,4 tonna spirtni 135 million soʻmga sotishga kelishib, shundan 1,9 tonna spirtni 108 million soʻmga sotgan vaqtida ashyoviy dalillar bilan qoʻlga olingan.

Shundan soʻng, tezkor tadbir davom ettirilib, fuqaro M.A.ning Zangiota tumani, “Dehqonobod” MFY hududidagi xonadonidan yana 6,1 tonna spirt, 130 dona boʻsh polietilen idishlari va idishlarga quyishda ishlatiladigan boshqa mahsulotlar ashyoviy dalil sifatida rasmiylashtirib olingan.

Hozirda mazkur holat yuzasidan Jinoyat kodeksining 186-1-moddasi (etil spirti, alkogolli mahsulot va tamaki mahsulotini qonunga xilof ravishda muomalaga kiritish yoki ishlab chiqarish) bilan jinoyat ishi qoʻzgʻatilib, tergov harakatlari oʻtkazilmoqda.