Hukumatning joriy yil 19-fevraldagi 70-son qarori bilan “Oʻzbekiston Respublikasi Prezidenti huzuridagi Davlat siyosati va boshqaruvi akademiyasida oliy taʼlimdan keyingi taʼlimga qabul qilish va oʻqitish tartibi toʻgʻrisida”gi nizom tasdiqlandi.

Hujjatga koʻra, Akademiyada oliy taʼlimdan keyingi taʼlimga qabul quyidagi taʼlim shakllari boʻyicha tashkil etiladi:

• tayanch doktorantura;

• doktorantura;

• mustaqil izlanuvchilik.

Oliy taʼlimdan keyingi taʼlimga qabul hujjatlari Yagona elektron tizim yoki YAIDXP (my.gov.uz) orqali topshiriladi.

Tayanch doktorantura va doktoranturaga oʻqishga kirish uchun hujjatlar har yili 15-sentyabrdan 15-oktyabrga qadar qabul qilinadi. Imtihonlar har yili 1-noyabrdan 25-noyabrga qadar oʻtkaziladi.

Akademiyada tayanch doktorantura, doktorantura va mustaqil izlanuvchilikka qabul qilish boʻyicha tanlov har biri 100 balli baholash tizimiga asoslangan quyidagi 2 bosqichda amalga oshiriladi:

• 1-bosqich – talabgorlar mutaxassislik fanlaridan imtihon (yozma, ogʻzaki, test) topshiradi;

• 2-bosqich – talabgorlar dissertatsiya rejasining mufassal loyihasini taqdimot qiladi.

Kirish imtihonlari natijalari haqidagi maʼlumotlar imtihonlar yakunlangandan soʻng Akademiyaning rasmiy veb-saytida eʼlon qilinadi.