Navoiy viloyatida noqonuniy saqlanayotgan 1 ming 100 dona patronlar rasmiylashtirib olindi. Bu haqida “Xavfsizlik” Telegram-kanali xabar berdi.

Unda aytilishicha, Davlat xavfsizlik xizmatining Navoiy viloyati boʻyicha boshqarmasi va Ichki ishlar organlari xodimlari hamkorligida oʻqotar qurollarning noqonuniy aylanmasiga qarshi kurashish yoʻnalishida Konimex tumanida tezkor tadbir oʻtkazilgan.

Mazkur tadbir davomida Buxoro viloyatining Gʻijduvon tumanida yashovchi, 1989-yilda tugʻilgan shaxsga tegishli “Onix” rusumli avtotransport vositasi koʻzdan kechirilganda, avtomashina yukxonasida 500 dona 5,6 mm kalibrli otish uchun yaroqli boʻlgan patronlar borligi aniqlanib, tegishli tartibda rasmiylashtirib olingan.

Shundan soʻng, tezkor tadbir davom ettirilib, ushbu shaxsning yashash xonadonidan ham noqonuniy saqlanayotgan 600 dona 5,6 mm kalibrli patronlar ashyoviy dalil sifatida olib qoʻyilgan.

Hozirda mazkur shaxsga nisbatan Jinoyat Kodeksining 248-moddasi (Oʻqotar qurolning, oʻq-dorilarning, oʻqotar qurol asosiy qismlarining, portlovchi moddalarning, portlatish vositalarining yoki portlatish qurilmalarining qonunga xilof muomalasi) 3-qismi bilan jinoyat ishi qoʻzgʻatilib, “qamoq” ehtiyot chorasi qoʻllanildi. Tergov harakatlari olib borilmoqda.