Qashqadaryoda haydovchi YPX inspektoriga oʻziga tegishli boʻlmagan hujjatlarni taqdim qildi. Holat yuzasidan viloyat Ichki ishlar boshqarmasi maʼlumot berdi.

Unda aytilishicha, shu yilning 20-fevral kuni Shahrisabz shahar Ichki ishlar boʻlimi Jamoat xavfsizligi xizmati Yoʻl harakati xavfsizligi boshqarmasi YPX inspektori kichik serjant F. Choriyev tomonidan xizmat vazifasi doirasida “Lacetti” rusumli transport vositasi tekshirish uchun toʻxtatilgan.

Tekshiruv davomida haydovchi fuqaro Sh.T. YPX inspektoriga oʻziga tegishli boʻlmagan hujjatlarni taqdim etgan. Shundan soʻng, haydovchi qochish uringan vaqtida toʻxtatilib, unga nisbatan OʻzR MJtKning 194-moddasi 1-qismi va 135-moddasi 3-qismi bilan maʼmuriy bayonnoma rasmiylashtirilgan.

Toʻplangan hujjatlar Jinoyat ishlari boʻyicha Shahrisabz shahar sudiga yuborilib, sud qaroriga koʻra, fuqaro Sh.T.ga nisbatan bazaviy hisoblash miqdorining 50 baravari miqdorida yaʼni 20 600 000 soʻm jarima jazosi tayinlangan.

Viloyat Ichki ishlar boshqarmasi maʼlumotiga koʻra, inspektor F. Choriyev xizmat vaqtida, xizmat kiyimida va hushyor holatda boʻlgan.