Foto: AFP

“Tolibon” Afgʻoniston hududida ayollarga nisbatan zoʻravonlikni qonuniylashtiruvchi yangi qonunni qabul qildi. Bu haqda “Daily Mail” oʻz manbalariga tayanib xabar tarqatdi.

Eʼlon qilingan yangi jinoyat kodeksiga koʻra, endilikda erlar jiddiy jarohat yetkazmasa, xotinlariga nisbatan jismoniy kuch ishlatishlari mumkin.

“Tolibon” oliy rahbari Hibatulloh Ohunzoda tomonidan tasdiqlangan ushbu 90 sahifali kodeks jinoyatchining ijtimoiy mavqeiga asoslangan tabaqalashtirilgan jazo tizimini joriy etadi. Xususan, kodeksning 9-moddasi Afgʻoniston jamiyatini toʻrt toifaga ajratadi: diniy olimlar (ulamo), elita aʼzolari (ashraf), oʻrta sinf va quyi sinflar.

Mutaxassislarning fikriga koʻra, bu tasnif asosan “ozod” va “qullar” oʻrtasidagi boʻlinishni qayta tiklaydigan, ayollarni qullar bilan tenglashtiradigan iyerarxik tizimni yaratadi.

Kodeksda “qul xoʻjayinlari”, xususan, erlarga oʻz xotinlariga yoki qoʻl ostidagilarga jismoniy jazo qoʻllashga ruxsat beruvchi qoidalar mavjud.

Agar jinoyat ulamolar yoki elita aʼzolari tomonidan sodir etilsa, jazo ogohlantirish yoki sudga chaqirish bilan cheklanadi.

Oʻrta sinf vakillari uchun shunga oʻxshash jinoyat qamoq jazosiga olib kelishi mumkin, “quyi sinf” uchun esa jismoniy jazo va qamoq jazosi koʻzda tutilgan.

“De Mahakumu Jazaai Osulnama” deb nomlangan Jinoyat kodeksi allaqachon mamlakat sudlarida tarqatilgan boʻlib, u Afgʻonistondan tashqaridagi inson huquqlari himoyachilari va faollarining tanqid hamda gʻazabiga sabab boʻldi.