Ijtimoiy tarmoqlarda Norin tumanida ikki “Damas” ishtirokida yoʻl-transport hodisasi sodir boʻlgani haqidagi videotasvirlar keng tarqaldi. Mazkur holat yuzasidan Namangan viloyati IIB YHXB maʼlumot berdi.

Unda aytilishicha, bugun, 18-fevral kuni soat 10:00 larda Norin tumani Xoʻjaqoʻrgʻoncha MFY hududidan oʻtgan D-115 avtomobil yoʻlining 10-kilometrida “Damas” rusumli avtomobilni boshqarib ketayotgan haydovchi Norin-Choʻja yoʻnalishida belgilangan tezlikni oshirib, qarama-qarshi yoʻnalishga oʻtib ketgan va oʻz yoʻnalishida harakatlanib kelayotgan boshqa bir “Damas” rusumli transport vositasi bilan toʻqnashgan.

Hodisa oqibatida toʻqnashuv kelib chiqishiga sabab boʻlgan “Damas” avtomashinasining old oʻrindigʻida boʻlgan 1 nafar yoʻlovchi ogʻir tan jarohati bilan shifoxonada vafot etgan. Avtomobil haydovchilari va yana 2 nafar yoʻlovchi esa turli darajadagi tan jarohatlari bilan kasalxonaga yotqizilgan.

Hozirda mazkur holat yuzasidan Norin tuman IIB huzuridagi Tergov boʻlinmasi tomonidan tergovga qadar tekshiruv harakatlari boshlab yuborilgan.