Hukumatning 2026-yil 11-fevraldagi 51-son qaroriga asosan xalqaro taʼlim dasturlari joriy etilgan texnikum xodimlari mehnatiga haq toʻlashning yangi tartibi tasdiqlandi. Bu haqida Taʼlim nazorati Telegram-kanali maʼlumot berdi.

Mazkur qarorga koʻra:

• 100 foizlik ustama: xalqaro dasturlarga jalb qilingan direktor, bosh buxgalter, oʻqituvchi va ustalarga har oylik majburiy ustama beriladi;
• Ragʻbatlantirish jamgʻarmasi: Mehnatga haq toʻlash fondining 50 foizi miqdorida maxsus jamgʻarma tashkil etiladi;
• Natijaga qarab mukofot: yuqori reyting balli toʻplagan pedagoglar bazaviy stavkasiga nisbatan 200 foizgacha qoʻshimcha ragʻbatlantiriladi.

Ragʻbatlantirish mezonlari:

• Oʻquvchilarning oʻzlashtirish darajasi va xalqaro tanlovlardagi gʻolibligi;
• Chet tilini bilish (kamida B2 sertifikati);
• Xalqaro ilmiy bazalardagi (Scopus, Web of Science) maqolalar;
• Dunyoning TOP-1000 taligiga kiruvchi OTM diplomiga egalik.

Shuningdek, xalqaro dasturlar boʻyicha boʻlim boshligʻi va mutaxassislarning ish haqi miqdorlari maktab direktori oʻrinbosari hamda toifali oʻqituvchilarning bazaviy stavkalariga tenglashtirilgan.