Ijtimoiy tarmoqlarda Surxondaryo viloyati Sherobod tumanida joylashgan maktablardan birining tom qismi qulab tushgani haqida xabarlar tarqaldi. Viloyat Maktabgacha va maktab taʼlimi boshqarmasi mazkur hodisa yuzasidan maʼlumot berdi.

Maʼlum qilinishicha, voqea joriy yilning 27-yanvar kuni Sherobod tumanining olis va togʻli hududidagi “Uzunsoy” MFY “Xomkon” qishlogʻida joylashgan 69-maktabning hashar yoʻli bilan loy-paxsadan qurilgan eski binosida yuz bergan. Hodisa ob-havo sharoitining keskin yomonlashuvi va qalin qor yogʻishi oqibatida roʻy bergani aytilmoqda.

Mazkur holat yuzasidan tuman hokimligi hamda tegishli masʼul tashkilotlar tomonidan voqea sodir boʻlgan kunning oʻzidayoq barcha zarur kuch va vositalar safarbar etilib, holatni bartaraf etish choralari koʻrilgan.

Bildirilishicha, 69-sonli umumtaʼlim maktabining eski binosi 2003-yilda aholi tomonidan hashar yoʻli bilan loy-paxsadan qurilgan.

2014-yilda mazkur maktab uchun Davlat dasturi asosida 140 oʻrinli yangi maktab binosi qurilib, foydalanishga topshirilgan. Shuningdek, 2022-yilda Davlat dasturi doirasida “Uzunsoy” MFY “Tuynuk” qishlogʻida 69-maktab uchun 40 oʻrinli maktab filiali binosi ham qurilib, foydalanishga topshirilgan.

2025-yil 30-avgustdan boshlab 2003-yilda hashar yoʻli bilan loy-paxsadan qurilgan eski maktab binosida oʻquv jarayonlarini olib borish qatʼiyan man etilgan.