Arxiv foto

Qirgʻizistonning sobiq prezidenti Almazbek Atambayev barcha davlat mukofotlaridan mahrum qilindi. Prezident matbuot xizmatining xabar berishicha, tegishli hujjatni respublikaning amaldagi rahbari Sadir Japarov imzolagan.

Sobiq prezident “Qirgʻiziston Qahramoni”, 2-darajali “Manas” ordeni, “Danaker” ordeni va “Dang” medalidan mahrum qilingan. Matbuot xizmatining taʼkidlashicha, orden va medallar keyinchalik respublikaning davlat mukofotlari jamgʻarmasiga oʻtkaziladi.

Bosh prokuratura sud ijrochilari xizmatiga Atambayevning davlat mukofotlarini keyinchalik davlat mukofotlari jamgʻarmasiga oʻtkazish uchun musodara qilish choralarini koʻrish topshirildi.

Atambayev 2011-yildan 2017-yilgacha Qirgʻiziston prezidenti boʻlgan, shundan soʻng u rasman mamlakat siyosiy hayotida faol ishtirok etmagan.

2025-yilning 3-iyun kuni Bishkekning Pervomayskiy tuman sudi uni 2019-yilda Koy-Tosh qishlogʻida sodir boʻlgan voqealar uchun aybdor deb topib, 11,5-yilga ozodlikdan mahrum qilgandi.

Atambayev oʻzi esa Gaagadagi Xalqaro jinoyat sudi tomonidan aybdor deb topilsa, har qanday qamoq jazosini oʻtashga tayyorligini maʼlum qilgan.