Oʻzbekiston Respublikasi Prezidenti Shavkat Mirziyoyev 11-noyabr kuni Rossiya Federatsiyasi Prezidenti Vladimir Putin bilan telefon orqali muloqot qildi.

Oʻzbekiston bilan Rossiya oʻrtasidagi keng qamrovli strategik sheriklik va ittifoqchilik munosabatlarini oliy darajadagi kelishuvlarni amalga oshirish doirasida yanada rivojlantirish va mustahkamlashning dolzarb masalalari muhokama qilindi.

Tovar ayirboshlashning oʻsish surʼatini saqlab qolish, iqtisodiyotning ustuvor tarmoqlarida kooperatsiyani, shu jumladan energetika sohasidagi qoʻshma loyihalarni ilgari surish, hududlarning ishbilarmonlik aloqalari va madaniy-gumanitar almashinuvini kengaytirishga alohida eʼtibor qaratildi.

Joriy yil 22-oktyabr kuni Moskva viloyatida oʻtgan Oʻzbekiston va Rossiya hududlari kengashining ikkinchi yigʻilishi samarali boʻlgani mamnuniyat bilan qayd etildi.

3-dekabr kuni boʻladigan Oʻzbekiston-Rossiya Hukumatlararo komissiyasining navbatdagi yigʻilishi va uning doirasida qoʻshma biznes forumini samarali oʻtkazish muhimligi taʼkidlandi.

Xalqaro va mintaqaviy ahamiyatga molik dolzarb masalalar yuzasidan ham fikr almashildi, boʻlajak tadbirlarning rejasi muhokama qilindi.