Foto: Qonunchilik palatasi matbuot xizmati

Oliy Majlis Qonunchilik palatasining navbatdagi majlisida “Aholini shovqinning zararli taʼsiridan himoya qilish toʻgʻrisida”gi qonun loyihasi ikkinchi oʻqishda koʻrib chiqildi. Bu haqda Qonunchilik palatasi matbuot xizmati xabar qildi.

Maʼlum qilinishicha, ushbu qonun loyihasi bilan aholini shovqinning zararli taʼsiridan himoya qilishning asosiy prinsiplari, atrof tabiiy muhitga shovqin orqali zararli taʼsir koʻrsatganlik uchun kompensatsiya toʻlovlari, aholini shovqinning zararli taʼsiridan himoya qilish sohasidagi davlat organlarining vakolatlari belgilab berildi.

Bundan tashqari, davlat organlari, jismoniy va yuridik shaxslarning aholini shovqinning zararli taʼsiridan himoya qilish sohasidagi vazifa va funksiyalari hamda javobgarlik sohalarining aniq chegaralari ham ushbu qonun loyihasi orqali koʻrsatib oʻtilgan. Sanitariya-epidemiologik osoyishtalik va jamoat salomatligi qoʻmitasi esa aholini shovqinning zararli taʼsiridan himoya qilish sohasidagi vakolatli organ boʻladi. Qonun loyihasi bilan fuqarolarning osoyishtaligi va normal dam olishini buzadigan harakatlarning qatʼiy roʻyxati ham tasdiqlandi.

Qayd etish kerakki, tungi vaqtda — sutkaning soat 23:00 dan 06:00 gacha boʻlgan vaqt oraligʻida, shuningdek dam olish kunlari va qonunchilik bilan belgilangan ishlanmaydigan bayram kunlari soat 22:00 dan 09:00 gacha vaqt oraligʻida — fuqarolarning osoyishtaligi va normal dam olishini buzganlik uchun maʼmuriy javobgarlikni kuchaytirish taklif etilmoqda.

Avvalroq, Vodiydagi jinoiy guruhga sud hukmi oʻqilgandi.