Foto: president.tj

20 noyabr kuni Tojikiston Respublikasi Prezidenti Emomali Rahmon mazkur mamlakatga rasmiy tashrif bilan kelgan Oʻzbekiston Respublikasi Oliy Majlisi Qonunchilik palatasi Spikeri Nurdinjon Ismoilovni qabul qildi.

Uchrashuvda ikki mamlakat oʻrtasidagi hamkorlik, jumladan, parlamentlararo aloqalarni rivojlantirish masalalari muhokama qilindi.

Emomali Rahmon mehmonni mamnuniyat bilan kutib oldi va ushbu tashrif, uning doirasidagi uchrashuvlar va muzokaralar Tojikiston va Oʻzbekiston oʻrtasidagi sheriklik munosabatlarini rivojlantirishda muhim ahamiyat kasb etishiga ishonch bildirdi.

Suhbat avvalida Respublikasi Oliy Majlisi Qonunchilik palatasi Spikeri Nurdinjon Ismoilov Tojikiston rahbarini Rogʻun GESning birinchi agregatini ishga tushirilgani bilan tabrikladi.

“Men mazkur yirik obyekt muvaffaqiyatli ishga tushirilishidan hayratdaman... Ushbu loyiha nafaqat Tojikiston xalqi uchun, balki Markaziy Osiyo mintaqasi xalqlari uchun ham muhimdir...”, dedi Nurdinjon Ismoilov.

Uchrashuvda ikki davlat oʻrtasidagi munosabatlarning strategik sheriklik darajasiga chiqishida Oʻzbekiston Prezidenti Shavkat Mirziyoyevning Tojikistonga amalga oshirgan davlat tashrifi ahamiyat kasb etgani qayd etildi.