Фарғона давлат техника университетида инновацион маҳсулотлар кўргазмаси ҳамда стартап лойиҳалар фестивали бўлиб ўтди. Унда вилоятдаги 9 та олий таълим муассасалари профессор-ўқитувчилари, ёш олимлар, талабалар, мустақил тадқиқотчилар қатнашди.

Илм-фан ютуқлари ва ишлаб чиқариш жараёнини ўзаро уйғунлаштиришга қаратилган тадбирда саноат, энергетика, ахборот технологиялари, қурилиш ва бошқа йўналишлардаги 50 дан ортиқ стартап лойиҳалар тақдимоти ўтказилди. Шунингдек, янги кашфиётлар ва амалий ишланмалар намойиш этилди.

— Ёш олимларга кўрсатилаётган эътибор ва рағбат туфайли сўнгги йилларда 10 дан зиёд инновацион лойиҳаларимиз амалиётга татбиқ этилди, —дейди Фарғона давлат техника университети докторанти Аҳаджон Ўлмасов. — Бугунги тадбирда алоҳида муҳофазаланадиган объектлар, ижтимоий соҳа муассасалари ҳамда жамоат жойларида хавфсизликни таъминлашга хизмат қилувчи патруль-робот қурилмаси тақдимотини ўтказдик. У соатига 20 км тезликда ҳаракатланиб, ўртача 5-6 км масофадаги ҳар бир ҳолатни ўз хотирасида жамлайди ва суратга олади.

Якунда сараланган лойиҳалар республика миқёсида ўтказиладиган “Inno Week – 2025” халқаро инновацион ҳафталигида иштирок этиши, лойиҳа ташаббускорлари инвесторлар ва тадбиркорлик субъектларига тақдимотлар ўтказиши ва грант маблағлари олиши учун тавсия этилди.

Ботир МАДИЁРОВ,

«Халқ сўзи».