АҚШ президенти Дональд Трамп ёзгача Украинадаги урушни тугатиш бўйича келишувга эришиш истаги борлигини маълум қилди.

Украина президенти Владимир Зеленскийнинг таъкидлашича, Қўшма Штатлар Киев ва Москва учун урушни тўхтатиш бўйича музокараларни июнь ойигача якунлаш муддатини белгилаган.

«АҚШ Украина ва Россияга урушни шу ёзнинг бошига қадар тугатишни таклиф қилмоқда. Улар барча жараёнлар июнь ойигача якунига етишини хоҳлаяпти», — деган Украина раҳбари.

Шунингдек Зеленский, Қўшма Штатлар навбатдаги уч томонлама музокараларни келаси ҳафта ўтказишни таклиф қилганини айтиб ўтган.

Унинг сўзларига кўра, бу сафар музокаралар илк бор Европа ёки Яқин Шарқда эмас, балки АҚШ ҳудудида ўтказилиши мумкин. Учрашув ўтказиладиган манзил сифатида Маями шаҳри кўрсатилган бўлиб, унда Украина делегацияси иштирок этиши тасдиқлаган.

Мазкур ташаббус Абу-Дабида бўлиб ўтган сўнгги музокаралардан кейин янграган. Маълумот учун, ушбу музокараларда ижобий келишувлар амалга ошмаган. Россия томони Украина қўшинларини Донбасс ҳудудидан олиб чиқишни ҳамон талаб қилмоқда. Киев эса бу талабни қатъиян рад этиб келяпти.