Тасаввур қилинг: кеч тушиб, оила дастурхон атрофида тўпланган маҳал “лип” этиб чироқ ўчиб қолади. Кайфият тушади. Иштаҳа бўғилади. “Қачон чироқ келаркан?”, дея кутмоқдан, шам ёруғида овқат тановул қилмоқдан бўлак илож йўқ.

Яқин-яқингача кўплаб қишлоқларда, айниқса, чекка ҳудудларда аҳвол шу эди. Бухоронинг айрим қишлоқларида ҳатто “Қишлоғимиз симёғочига чумчуқ қўнса ҳам чироқ ўчади”, деган гармдоридек аччиқ гап қулоққа тез-тез чалинарди.

Юртимизнинг энг чекка гўшаларидан саналган Олот тумани Ғанчи Чандир маҳалласида яшовчи 78 ёшли Қурбонмурод бобога ҳам бу манзара бегона эмас. Бироқ турмуш ўртоғи билан етти нафар фарзандни оқ ювиб, оқ тараган, невара-ю чеваралари саноғида дафъатан адашиб қоладиган отахон умридан нолимайди. Умид билан яшаган муродига етади, деб билади. Буни қарангки, муродга етадиган кунлар келди. Олотда қуввати 250 МВт бўлган қуёш фотоэлектр станцияси ҳамда электр энергиясини сақлаш тизими ишга туширилди.

  Бирлашган Араб Амирликларининг “Маsdar” компанияси томонидан барпо этилган бу йирик лойиҳага 273 миллион АҚШ долларига тенг миқдорда инвестиция жалб қилинди. Иншоот 648 гектар майдонни эгаллагани, унинг қурилишида 1500 нафардан зиёд маҳаллий ва хорижий мутахассис ҳамда ишчилар меҳнат қилганининг ўзиёқ давлатимиз раҳбарининг тегишли қарори асосида рўёбга чиққан бу ишнинг оламшумул аҳамиятини кўрсатади. Бу ерда 254 минг хонадоннинг бир йиллик истеъмолига тенг “яшил энергия” ишлаб чиқарилади. Эътиборлиси, 192 миллион метр куб табиий газ тежалади. Шунинг эвазига 266 тонна зарарли моддаларнинг ҳавога чиқарилиши олди олинади.

– Ишонч ва умид, сабру қаноат билан яшаганга нима етсин, – дейди Қурбонмурод ота. – Шукр, уйимиз ҳам, кўнглимиз ҳам чароғон бўлди. Узр, қулоғим сал оғирроқ. “Симёғочга чумчуқ қўнди”, дейсизми? Майли, чумчуқ тугул, олақарға ҳам қўнсин. Энди чироғимиз ўчмайди.

Истам ИБРОҲИМОВ

(«Халқ сўзи»).