Фото: Rambler

Жанубий Кореянинг “Samsung Electronics” компаниясининг вице-президенти ва амалдаги раҳбари Ли Чжэ Ён компания бошқарувини ўз фарзандларига топшириш нияти йўқлигини маълум қилди.

Қайд этилишича, Ли Чжэ Ён ҳақиқатан ҳам раҳбарликни фарзандларига топширмаса, уч авлод томонидан кетма-кетма бошқарилиб келинаётган асосчиларнинг сулоласи якунланади.

“Samsung”нинг Сеулдаги штаб-квартирасида нутқ сўзлаган Ли Чжэ Ён коррупция можароси, шунингдек, компаниянинг топ-менежерлари томонидан касаба уюшмаларига қарши йўл қўйилган қонунбузарликлар учун узр сўради ва ходимларига касаба уюшмаларида бирлашиши, жамоавий савдода қатнашиши ҳамда тинч йиғилишларда иштирок этишлари мумкинлигини ваъда қилди.

Ли Чжэ Ённинг баёноти шуни кўрсатдики, эндиликда “Samsung” компаниясини асосчилар оиласига тегишли бўлган инсон эмас, балки қобилиятларига қараб танланадиган профессионал менежерлар бошқаради.

Гарвард университетини тамомлаган ва учта тилни биладиган Ли Чжэ Ён ҳозирда “Samsung”нинг кундалик операцияларини бошқаришда иштирок этмаяпти, аммо унинг иштирокисиз бирорта йирик, шу жумладан, жиддий сармоялар билан боғлиқ қарор қабул қилинмаяпти.

Маълумот ўрнида, Ли Чжэ Ённинг соғлиғи сабабли нафақага чиққан отаси Ли Кун Хи вафот этган тақдирда компанияни тўсқинликларсиз назоратга олишга уринишлари унинг учун кўп муаммоларни, шу жумладан, бир йиллик қамоқ жазосини ўташ сабабини ҳам келтириб чиқарган эди.

“Мен компаниядаги ролимни болаларимга топширишни режалаштирмаяпман. Бу ҳақда кўпдан бери ўйлаб юрибман, лекин бу ҳақда очиқ гапиришни хоҳламайман”, дейди у.