Саминжон ҲУСАНОВ/«Халқ сўзи». Хўжаобод туманида табиий ресурслардан оқилона фойдаланиш туфайли электр энергияси ва унга сарфланадиган маблағни иқтисод қилишга эришилмоқда. Мисол учун, туман тиббиёт бирлашмаси тасарруфидаги масканларга 104 кВт қуёш панеллари ўрнатилган бўлиб, натижада бир ойда 21 минг кВт электр энергиясини тежашга эришилмоқда. Амалда ўзини оқлаган тажриба эндиликда хонадонларга ҳам кўчган.

– Ҳар йили куз-қиш мавсумида таъминотда узилишлар юзага келар эди, – дейди «Андижон» маҳалласида яшовчи Муҳиддин Қобулов. – Бу мавсумдан кўнглим тўқ. Боиси, хонадонимга ўрнатилган панеллар орқали узлуксиз таъминотга эга бўлдим. Эътиборли жиҳати, эҳтиёжимдан ортган энергияни давлатга сотишим хам мумкин. Ҳисоб-китобларга кўра, қуёш панеллари учун сарфлаган маблағим 4 йилда ўзини оқлайди.

Туманда фаолият олиб бораётган цемент заводининг 14 гектар майдонига ана шундай қурилма ўрнатилмоқда. У орқали 8400 кВт электр энергияси ишлаб чиқарилади. Заводнинг эҳтиёжи 7500 кВтдан иборат бўлгани боис ортиб қолган салкам 1000 кВт энергияни аҳоли истеъмолига йўналтириш кўзда тутилган.