Польшанинг Торунь шаҳрида бўлиб ўтган XII Халқаро Осиё конгресси доирасида мамлакатимизнинг Польшадаги элчихонаси томонидан Николай Коперник номидаги университетда бизнес-форум ва «Ўзбекистон куни» тадбири ташкил этилди. Бу ҳақда «Тараққиёт стратегияси» маркази Ахборот хизмати маълум қилди.

Тадбирда «Тараққиёт стратегияси» маркази директори Элдор Туляков, Олий суд раиси ўринбосари, иқтисодий ишлар бўйича судлов ҳайъати раиси Шуҳрат Полвонов,  Ўзбекистон Республикасининг Польша Республикасидаги элчиси Амирсаид Агзамходжаев ҳамда ўзбек ишбилармон доиралари вакиллари, Польша томонидан эса Тараққиёт ва технологиялар вазирлиги, Польша инвестициялар ва савдо агентлиги, «Польша — Осиё» савдо палатаси, Куявия-Померания воеводлиги маршал идораси, Торунь шаҳар мэри раҳбарияти, ҳудудий савдо-саноат палатаси ҳамда «Equnico», «Polpharma», «Torun Direct», «Alsal», «ControlTec», «Trans-Rach» каби нуфузли компаниялар вакиллари иштирок этди.

Ўзбекистоннинг иқтисодий ва инвестициявий салоҳиятига бағишланган тақдимотда «Тараққиёт стратегияси» маркази директори Э. Туляков мамлакатимизда «Ўзбекистон — 2030» стратегияси доирасида амалга оширилаётган ислоҳотларнинг мазмун-моҳияти, польшалик ва европалик ҳамкорлар учун истиқболли ҳамкорлик йўналишлари, инвесторлар учун яратилган қулай шарт-шароитлар, ҳудудлараро ҳамкорликнинг ривожланиш тенденциялари, шунингдек, икки томонлама савдо-иқтисодий ва инвестициявий муносабатларнинг бугунги ҳолати ва истиқболлари ҳақида маълумот берди.

Тадбир доирасида Николай Коперник номидаги Торунь университетида «Ўзбекистон куни» ташкил этилди. Унда мамлакатимизнинг миллий ва маданий мероси, савдо-иқтисодий ҳамда инвестициявий салоҳияти намойиш этилди. Шунингдек, кўргазмалар, тақдимотлар, муҳокамалар ва «Ибрат» фильмининг намойиши бўлиб ўтди.

Ушбу ташаббус Ўзбекистон ва Польша ўртасида янги ҳамкорлик алоқаларини йўлга қўйишга ва соҳавий ҳамкорликни кенгайтиришга хизмат қилади, деб умид қиламиз.