Эроннинг шимоли-ғарбида жойлашган, қарийб 4 минг йиллик тарихга эга Осиёдаги энг йирик шўр сув ҳавзаси ҳисобланган Урмия кўли бутунлай қуриб қолди. Бир вақтлар Констанс кўлидан ўн баравар катта бўлган ушбу кўл ҳозирда фақатгина кичик кўлмакчаларга айланиб қолган.

1980 йилларда Урмиянинг узунлиги 140 километрга, кенглиги эса 55 километрга етган. Аммо 2025 йил ёзига келиб, унинг туби қуриб, илдизидан йўқолди.

Экологлар ва мухолифат оммавий ахборот воситалари бу ҳолатни табиий жараён эмас, балки ҳукумат сиёсати оқибатида юзага чиққан экологик фалокат, дея баҳоламоқда. «Iran News Update» маълумотларига кўра, мамлакатда йиллар давомида ер ости сувларини қуритиб келган миллиондан ортиқ ноқонуний қудуқлар очилган. Шунингдек, сув ресурсларининг 88 фоизи қишлоқ хўжалигига сарфланиши вазиятни янада оғирлаштирган. Бироқ ушбу тармоқ мамлакат ялпи ички маҳсулотининг атиги 10 фоизини таъминлайди.

Президент Масъуд Пезешкиён ҳам июль ойидаги чиқишида сув танқислиги Эрон учун катта муаммога айланганини тан олди. Унинг айтишича, расмийлар ҳатто 15 миллиондан ортиқ аҳоли яшайдиган пойтахт — Теҳронни кўчириш масаласини ҳам кўриб чиқишга мажбур бўлмоқда.

Урмиянинг қуриши нафақат экотизимга, балки одамлар ҳаётига ҳам жиддий хавф туғдиради. Қуриган кўл туз бўронларини келтириб чиқариши мумкин. Бу эса тупроқнинг унумдорлигини йўқотиб, қишлоқ хўжалигини яроқсиз ҳолга келтиради. Натижада юз минглаб одамлар саломатлиги ва турмуш шароити таҳдид остида қолиши мумкин.