Абдулазиз ЙЎЛДОШEВ/«Халқ сўзи». Бугунги ахборот асрида ҳаётимизни рақамли технологияларсиз тасаввур қилиб бўлмайди. Шу боис мамлакатимизда соҳани янада ривожлантириш ва ёшларни унга тўғри йўналтириш борасида бир қатор ишлар амалга оширилмоқда.

Президентимизнинг «Ҳудудларда ёшларга рақамли технологиялар ва хорижий тилларни ўрганиш учун қўшимча шароитлар яратишга қаратилган «IT-шаҳарча»лар фаолиятини ташкил этиш тўғрисида»ги қарорига мувофиқ ҳар бир вилоятда биттадан «IT-шаҳарча»лар ташкил этиш белгиланган.

Самарқанд вилоятидан Қўшработ туманининг олис Чиммос маҳалласи танлаб олиниб, «IT-шаҳарча» барпо қилинди. Унинг расмий очилиш маросимида Рақамли технологиялар вазирлиги, Самарқанд ва Қўшработ тумани ҳокимлиги, туман фаоллари ҳамда ёшлар иштирок этди.

Тадбирда қайд этилганидек, бу ерда олиб борилган қурилиш ва ободонлаштириш ишлари натижасида 35 сотих бўш ва фойдаланилмай ётган ер майдонида ёшларнинг IT ва хорижий тилларни ўрганиши учун барча шароитлар яратишга эга «IT-шаҳарча» иш бошлади.

Мазкур масканда йилига минг нафарга яқин ёшлар дастурлаш, графика дизайни, компьютер саводхонлиги каби соҳаларда чуқур билим олишади. Инглиз ва бошқа хорижий тилларни ҳам бепул ўрганиш имкониятига эга бўлишади.