“Насаф” жамоаси учун Элит Осиё чемпионлар лигаси мусобақаси якунланди. Жамоа мусобақада 8 та ўйин ўтказди. Шулардан 6 тасида мағлубиятга учради. 1 тасида дуранг ўйнади ва сўнгги турда “Шаржа” устидан ғалаба қозонди.

“Насаф” мусобақани 4 очко билан якунлади. Жамоага гуруҳдан чиқиш учун яна 4–5 очко етишмади. Яхшилаб ўйлаб қаралса, бу очколарни тўплаш нореал нарса эмас эди. Лекин жамоа ўзининг хатоликлари эвазига мусобақа билан хайрлашди. Бугун сиз билан “Насаф”нинг ушбу турнирдаги хатоларига тўхталамиз.

Биринчидан, нотўғри трансфер сиёсати

Билансиз, Ўзбекистонда мавсум янги йил бошида, OFK мусобақалари эса йилнинг иккинчи ярмида старт олади. Шунингдек, клубларда йил учун тўпланган таркибни ёзда янада сўзлаш, йил бошида кучсиздек кўринган чизиқларни кучайтириш имконияти мавжуд. Фақатгина тўғри трансфер сиёсати юритилса.

Лекин “Насаф” ёзда бирорта сифатли трансфер амалга ошира олмади. Жамоа ёзда асосий эътиборини легионер футболчиларга қаратди. Натижада клубга Юсуф Отубанджо, Аденис Шала ва Кингсли Сокари келди. Бироқ бу футболчилардан ҳеч бири жамоада муқим ўрин эгаллай олмади. Натижада ёзда кучайтирилиши керак бўлган жамоа, тескари равишда кучсизланиб қолди.

Иккинчидан, қурбон қилинган ўйинлар

“Насаф” клуби 2024-йилги мавсум Осиё чемпионлар лигаси 2 турнирда қатнашган ва миллий чемпионатни ютиш йўлида кўплаб ўйинларни қурбон қилгани кўпчиликнинг ёдида бўлса керак. Жамоа бу гал ҳам битта ўйинда шундай йўл тутди.

Жамоа мусобақанинг учинчи турида Бирлашган Араб Амирликларининг “Шабаб Аль-Ахли” клуби билан тўқнаш келди. Жамоани ушбу ўйинлардан сўнг, Суперлигада OKМК ва “Навбаҳор”га қарши ўйинлар кутарди. Шу ҳолатда жамоа клубга мўмай даромад олиб келиши мумкин бўлган халқаро мусобақани иккинчи планда қолдириб қўйди ва “Шабаб Аль-Ахли”га қарши ўйинда асосий футболчиларни захирада қолдирди. Натижада ўйин “араблар”нинг 4:1 ҳисобидаги ғалабаси билан якунланди.

Ётмаганига жамоа Суперлигада ҳам на OKМКни, на “Навбаҳор”ни мағлуб эта олмади. Шу ерда бир фикр айтиш мумкин: ҳукумат қарори билан биз клубларни хусусийлаштириш ҳақида ўйлаяпмиз. Шу шароитда клублар раҳбарияти ҳеч кимдан кам бўлмаган ҳолда мустақил пул топиш йўлларини кўриб чиқиши керак эди. “Насаф” жамоаси чемпионлар лигасида қатнашиш орқали 1 миллион долларга яқин пул ишлаб олди. Бу рақамлар янада каттароқ бўлиши мумкин эди. Фақат бу учун клублар маҳаллий чемпионатни эмас, халқаро турнирни биринчи ўринга қўйиб ҳаракат қилиши зарур эди.

Учинчидан, уй ўйинларидаги муваффақиятсизлик

Бундай турнирларда ҳар бир жамоа мезбон сифатида ўтказадиган ўйинларда максимал очко тўплашга интилиши табиий. Шу боис, “Насаф” ҳам шундай йўл тутганида, жамоа мухлислари аллақачон ним-чорак финал йўлланмасини нишонлаётган бўлар эди.

“Насаф” бу мавсум Элит чемпионлар лигасида Бирлашган Араб Амирликларининг “Ал-Ваҳда”, Эроннинг “Трактор”, Саудия Арабистонининг “Ал-Хилол” ва Ироқнинг “Ал-Шорта” каби клубларига қарши ўз майдонида ўйнади.

Бу жамоалар орасида фақат “Ал-Хилол”ни мағлуб этиш қийин эди. Аммо қолган 3 та клубга нисбатан бу қийин масала эмас. Тўғри, бу клублар кучсиз эмас. Лекин гуруҳдан чиқмоқчи бўлган жамоа камида шу даражадаги клублардан очко тортиб олиши талаб этилар эди.

Лекин “Насаф” клуби “Трактор”га ҳам, “Ал-Ваҳда”га ҳам мағлуб бўлди. Бир неча асосий футболчиларсиз Ўзбекистонга ташриф буюрган Ироқнинг “Ал-Шорта” клуби юртимиздан 1 очко билан қайтди.

Тасаввур қилинг, агар шу 3 та ўйин ютилганида, ҳозир “Насаф”да 12 очко бўларди ва жамоа бешинчи ёки олтинчи ўрин билан мусобақанинг ним-чорак финал босқичига йўл олган бўлар эди.

Афсуски, бундай бўлмади. Элит чемпионлар лигаси Ўзбекистон клублари учун қийин майдон эканини кўрдик. Бунга қарамасдан, Қайрат Европа чемпионлар лигасида ўйнаб юрган даврда ҳам барча нарсани уддалаш мумкинлигини тушундик.

Келаси мавсум ушбу мусобақада Фарғонанинг “Нефтчи” клуби юртимиз шарафини ҳимоя қилади. Умид қиламизки, ушбу жамоа бу мавсум “Насаф” қилган хатоларни такрорламайди.