Видеодан кадр

Кеча, 16 сентябрь куни Хитойнинг Чанчун шаҳрида ўтказилаётган авиашоу репетицияси пайтида икки учувчи автомобил тўқнашиб кетди. Бу ҳақда ишлаб чиқарувчи компания “XPeng AeroHT” маълумотларига таяниб, “Newsweek” хабар берди.

Компания баёнотига кўра, тўқнашувга парвоз масофасининг қисқалиги сабаб бўлган. Тўқнашувдан сўнг аппаратлардан бири муваффақиятли қўнган, иккинчиси эса зарарлангани туфайли ёниб кетган.

Таъкидланишича, ҳодиса оқибатида ҳеч ким жабрланмаган. Ҳозирда воқеа бўйича текширув бошланган, сабаблар расмий равишда ўрганилмоқда.

Мутахассислар бу ҳолат учувчи транспорт хавфсизлиги юзасидан саволларни кучайтиради, деб ҳисобламоқда. Бироқ, айни пайтда, бу Хитойдаги электр автомобил саноати ривожига жиддий таъсир кўрсатмаслиги айтилмоқда.

Маълумот учун, “XPeng AeroHT” — Хитойнинг электромобиль ишлаб чиқарувчи “Xpeng” компаниясига тегишли бўлиб, ҳозирда электр учувчи транспорт (eVTOL) соҳасини ривожлантирмоқда.

Учувчи машиналар келажаги: инновациями ёки хавф?

Учувчи электр транспорт (eVTOL)лар дунёда турли давлатларда синовдан ўтказилаётган бўлса-да, улар ҳали ҳам жиддий муаммоларга дуч келмоқда. Масалан, АҚШда 2019 йилда “Kitty Hawk Heaviside” прототипи синов учиши пайтида қулаб тушган. Текширувлар бу ҳодисани дастурий хатолик ва техник носозликлар билан изоҳлаган.

Шунингдек, 2022 йилда америкалик “Joby Aviation” компаниясининг eVTOL прототипи пропеллер бузилиши туфайли ҳалокатга учраган. НТСБʼнинг хулосасига кўра, конструкция ва материал муаммолари бу жараёнда ҳал қилувчи омил бўлган.

2023 йилда эса Буюк Британия ва Канадада рўй берган бир нечта ҳодиса ҳам соҳадаги тизимли хатарларни юзага чиқарди. Хусусан, “Vertical Aerospace” компанияси прототипининг аварияси техник текширувлар ва регулятор назорати ўртасидаги камчиликларни кўрсатиб берди. Бу ҳолат авиация соҳасида сертификатлаш ва қоидаларни сўзсиз кучайтириш кераклигини англатади.