Фото: Халқ сўзи

Андижон вилояти Қўрғонтепа туманида истиқомат қилувчи Мўйдинжон Абдураҳимов қишнинг совуқ кунларида ҳам иссиқлик таъминотисиз фаолият юритувчи иссиқхонага эга соҳибкорлардан бири. У ўз томорқасида ташкил этган иссиқхонасида цитрус мевалар етиштиришнинг хадисини олган.

— Иссиқхонамизни хитойча усулда ташкил этганмиз, - дейди Мўйдинжон Абдураҳимов. — Яъни, ер остида жойлашган бўлиб, усти икки қавват плёнка билан ёпилган. Ташқарида 20 даража совуқ бўлганда ҳам бу ерда 5 даражадан 15 даражагача иссиқликни таъминлаш мумкин. Бунинг учун ҳеч қандай ёнилғига ҳожат йўқ.

Одатда респуликамиз иссиқхоналарида лимон етиштириш тажрибаси оммалашган. Мўйдинжон Абдураҳимов иссиқхонасида эса мандаринни йиғиш мавсуми бошланди.

— Мандарин дарахти 200 йил умр кўради, - дейди у. — Томорқамдаги кўчатлар 4 йиллик бўлишига қарамай, мўл ҳосил бермоқда. Умуман олганда, бир сотих майдонда 1 тонна мева йиғишни режалаштирганмиз.

Бу йил Андижон вилоятидаги мавжуд иссиқхоналардан 12 минг 623 тонна маҳсулот йиғиштириб олинди. Бу кўрсаткичда томорқаларда етиштирилган ҳосилларнинг ҳам муносиб ҳиссаси бор.

Саминжон ҲУСАНОВ, «Халқ сўзи».