Мамлакатимиз иқтисодиётини юксалтиришда маҳаллий ишлаб чиқарувчиларнинг ҳиссаси беқиёс. Бу эса нафақат иқтисодий барқарорликка, балки аҳоли бандлигини таъминлашга ҳам хизмат қилади. Бунга эришишда давлат томонидан тадбиркорлик фаолиятини ривожлантириш учун яратилган шароитлар, солиқ ва кредит имтиёзлари, инфратузилма ва замонавий технологиялар билан таъминлаш каби қатор қулайликлар муҳим роль ўйнайди. Шу йўналишда маҳаллий ишлаб чиқарувчилар давлат сиёсати ва имтиёзлардан самарали фойдаланиб, иқтисодиётда муҳим ўрин эгалламоқда.

Мисол тариқасида Балиқчи туманида фаолият юритаётган «Vodiy agrotech» агрокластерини келтириш мумкин. Бу корхона пахта хом ашёсини қайта ишлаб, тола, чигит, ўсимлик ёғи, кунжара ва совун каби тайёр маҳсулотлар ишлаб чиқаради. Маҳсулотлар нафақат ички бозорда, балки хорижий давлатларга ҳам экспорт қилинади ва ойига ўртача 1 миллион АҚШ доллари миқдорида ташқи савдо амалга оширилади.

— Агрокластернинг яна бир муҳим жиҳати аҳоли бандлигини таъминлашдаги ҳиссасидир, — дейди туман ҳокимлиги масъул ходими Музаффаржон Каримов.  — Бугунги кунда заводда 200 нафардан ортиқ маҳаллий аҳоли доимий иш билан таъминланган бўлса, пахта мавсумида иш ўринлари янада кенгайиб, 500 нафаргача етмоқда. Бу эса маҳаллий аҳоли даромадини ошириш, иқтисодий фаолликни ривожлантириш ва тадбиркорлик муҳитини мустаҳкамлашда ўз таъсирини кўрсатмоқда.

Саминжон ҲУСАНОВ, «Халқ сўзи».