Мамлакатимиз раҳбари томонидан ҳафтанинг пайшанба куни вазирлик, идора ва ҳокимликларда “Ёшлар куни” бўлиши белгилангач дастлабки кунда Навоий вилояти ҳокими Хатирчи туманида бўлиб, бир қатор муассасаларда ёшлар билан очиқ мулоқот ўтказди.

Хатирчи вилоятнинг аҳоли зич жойлашган ҳудудлардан бири бўлиб, ёшлар бандлигини таъминлаш узоқ йиллардан буён муаммо бўлиб қолмоқда. Вилоят ҳокими давлатимиз раҳбарининг яқинда бўлиб ўтган ёшлар билан учрашувда илгари сурган имкониятлар ҳақида батафсил маълумот берди.

Берилган ҳар бир имкониятдан фойдаланган киши ҳақиқий ватанпарвар бўлади, —деди вилоят ҳокими Нормат Турсунов. — Менделеев олимпиадасида ғолиб бўлган йигитнинг шижоати шунчаки ватанпарварлик эмас, балки жасорат ҳам десак бўлади.

Ёшлар билан учрашувнинг навбатдаги манзили “Навбаҳор” маҳалласи бўлди. Маҳаллада ёшлар бандлигини таъминлашга, жиноятчиликка қарши курашишга масъул бўлган тегишли раҳбарларнинг амалга оширилган ишлари таҳлил этилиб, ёшлар билан ишлашда янгича ёндашувларга таяниш, ҳуқуқбузарликларни олдини олиш, улар билан индивидуал ишлаш, ёшлар муаммоларини бевосита маҳаллаларда ҳал этиш, таълим муассасаларида маънавий-маърифий ва тарбиявий ишларнинг самарадорлигини янада ошириш лозимлиги таъкидланди.

Туманнинг “Тошқулоқ” маҳалласида бўлиб ўтган сайёр қабулда эса “Истиқлол” маҳалласида яшовчи фуқаро Эргаш Тошпўлатов ички йўлларни, “Фидокор” маҳалласида истиқомат қилувчи фуқаро Дилбар Шералиеванинг 11-сонли мактабга бориш йўлини асфальтлаштириш юзасидан аввалги сайёр қабулда(2026й. 30 янв.) қилган мурожаатлари бўйича масъулларнинг лойиҳа тақдимотлари ўтказилди. Унга кўра “Истиқлол” маҳалласи ички йўлларининг 1 км 400 метри, “Фидокор” маҳалласидаги 11-сонли мактабга бориш ички йўлларининг 1 км 600 метри асфальтлаштирилади. Шунингдек, 30 км ички йўлларни тупроқ ва шағаллаштириш бўйича ҳам махсус техникалар ажратилиб, ҳашар йўли билан ички йўллар таъмирланиши белгиланди.

Тумандаги 1-сон техникумида 725 нафар ўқувчи 7 та таълим йўналишида касб ҳунар ўрганишмоқда. Унинг 1978 ва 2000 йилларда қурилган ўқув бинолари, таъмирталаб ҳамда жиҳозларининг маънан ва техник жиҳатдан ўз муддатини ўтаб бўлган. Техникум ёшлари билан учрашувда ўқув биноларининг таъмирланиши, бўш турган ер майдонида ўқувчилар ва маҳалла ёшлари учун спорт зали қурилиши белгиланди.

Темур ЭШБОЕВ, “Халқ сўзи”.