Фото: Халқ сўзи

Янги йилни тақдир тақозосига кўра хорижда кутиб олишга мажбур бўлаётган юртдошларимиз сони оз эмас. Улар хонадонига бориб, оила аъзолари ҳолидан хабар олиш, кўнгилларга байрам қувончини улашиш ҳам, бизнингча, инсонийликнинг ёрқин намунасидир.

Ана шундан келиб чиққан Бухоро вилоят ҳокими Ботир Зарипов айни пайтда тирикчилик важидан хорижда меҳнат қилаётган мигрантлар, жумладан, Муҳиба Норқулованинг хонадонида бўлди. Бухоро шаҳридаги Мутал Бурҳонов маҳалласида яшовчи бу оила аъзолари билан самимий суҳбат жараёнида ҳоким хонадондаги шарт--шароит билан яқиндан танишди. Оилага байрам совғаларини топширди. Байрам кунларидаги бу кутилмаган ташриф, айниқса, оилада ўсиб – улғаётган болалар учун эсда қоларли кечди.

Айтмоқчи, мигрантлар хонадонига ташрифдан аввал вилоят ҳокими ҳозир хорижда бўлиб турган бир гуруҳ меҳнат муҳожирлари билан онлайн мулоқот ўтказди. Суҳбат давомида юртдошларимизнинг яшаш ва иш шароитлари билан қизиқди, уларнинг таклифлари, фикр-мулоҳазаларини тинглади. Вилоятда яратилаётган иш ўринлари ҳақида ҳам атрофлича маълумот берилди.

Истам ИБРОҲИМОВ, «Халқ сўзи».