Google компанияси Россия ҳудудида жойлаштирилган эски серверларини олиб чиқишни режалаштирмоқда. РБК нашрининг ёзишича, корпорация интернет-провайдерларга расмий мактуб йўллаб, Dell R270 русумидаги кэш-серверларни қайтариб олиш нияти борлигини маълум қилган.

Маълумотларга кўра, гап Google Global Cache (GGC) тизими доирасида фойдаланилган серверлар ҳақида бормоқда. Ушбу тизим Google контентини фойдаланувчиларга тезроқ етказиб бериш учун мўлжалланган бўлиб, компания бундай серверларни дунёнинг турли мамлакатларида, жумладан, 2022 йилгача Россияда ҳам алоқа операторлари ҳузурида ўрнатган.

Манбанинг қайд этишича, Google провайдерлардан ушбу серверларни ўчириш, жойидан чиқариш ва уларни қаердан олиб кетиш мумкинлигини кўрсатишни сўраган. Айрим интернет-провайдерларда эса мазкур серверлар аллақачон олиб чиқиб кетилган.

Аввалроқ судлар Googleʼни Роскомнадзор аниқлаган қоидабузарликлар учун бир неча бор жаримага тортган. Шунингдек, компания Федерал монополияга қарши хизмат (ФАС) қарорига асосан ҳам жазоланган.

ФАС хулосасига кўра, YouTube платформасида аккаунтлар ва контентни блоклаш жараёни шаффоф эмас ва объектив мезонларга тўлиқ жавоб бермайди.