Аҳолига тиббий хизмат кўрсатиш сифатини ошириш, касалликларни эрта аниқлаш ва соғлом турмуш тарзини кенг тарғиб этиш мақсадида Сурхондарё вилоятининг Термиз туманида навбатдаги тиббий тадбир ўтказилди.

Тошкент давлат тиббиёт университети Термиз филиали профессор-ўқитувчилари томонидан Орол маҳалласига қарашли Халқобод оилавий шифокорлик пунктида бепул тиббий кўрик ташкил этилди.

Кўрик доирасида, айниқса, аёллар саломатлигига алоҳида эътибор қаратилди. Хусусан, бачадон бўйни саратонини эрта аниқлаш мақсадида скрининг текширувлари ўтказилди. Мутахассислар томонидан хасталикларнинг олдини олиш, тўғри овқатланиш ва соғлом турмуш тарзига риоя этиш бўйича амалий тавсиялар берилди.

Тадбир давомида 200 нафардан ортиқ фуқаро чуқурлаштирилган тиббий кўрикдан ўтказилиб, аниқланган касалликлар бўйича тегишли маслаҳат ва даволаниш юзасидан йўлланмалар берилди.

— Шифокорлар бизни батафсил кўрикдан ўтказди, керакли маслаҳатлар берди, — дейди Мукаррам Ҳакимова. — Айниқса, аёллар саломатлигига қаратилаётган эътибор жуда муҳим. Бундай тадбирлар биз учун жуда фойдали бўлди.

Шунингдек, тадбир доирасида аҳолининг тиббий саводхонлигини ошириш, касалликларнинг олдини олиш ва эрта аниқлаш масалаларига бағишланган тарғибот ишлари ҳам олиб борилди.

Бундай амалий тадбирлар вилоят бўйлаб давом эттирилмоқда.

Фарҳод ЭСОНОВ, «Халқ сўзи».