Болаликнинг сўнгги кунлари

13 август — Ўзбекистон халқ шоири

Усмон Азим таваллуд топган кун

У баҳорни кутди интизор,

Йўлларига куз тутди илҳақ.

Қуёш чиқса, эриб битса қор,

Тўйиб-тўйиб ўйнарди чиллак.

Келиб қолди баҳор ҳам мана,

Далаларга сочиб лолалар.

Тепаликда қувонч-тантана —

Чиллак ўйнаб кетди болалар.

Кутиб олди уни ҳам шўхлик.

Очганича кенг қучоғини,

Нимагадир шўхлик ҳам қизиқ!

Босолмади дил чанқоғини.

Дўстларига боқди у ҳайрон,

Дўстлар чиллак ўйнар берилиб,

Бола кўнгли бўлганча вайрон.

Бир зумгина қолди термулиб.

Сўнгра сирли хаёлга чўмиб,

Чиқиб кетди дала томонга.

Лолаларга ўзини кўмиб,

Узоқ-узоқ боқди осмонга.

Вой-бўй!.. Осмон бунчалар тиниқ!

Софлигига не бўлар қиёс?

Ўйлаб кетди, ўйлади... қизиқ,

Қиз кўзига ўхшаркан бир оз...

У кечгача қолди шу кўйи,

Узун-узун хаёллар сурди.

Тепаликда бўлса кун бўйи,

Болалиги ҳайқириб турди.