Иллюстратив фото

Жорий йилнинг 25 март куни Президентнинг «Эко-маданият» умуммиллий лойиҳаси доирасида экологик таълим, илм-фан ва тарғиботни жадаллаштиришга оид комплекс чора-тадбирлар тўғрисида»ги ПҚ–110-сон қарори қабул қилинди.

Қайд этилишича, ушбу қарорни қабул қилишдан кўзланган асосий мақсадлар этиб қуйидагилар белгиланган:

• 2026-2027 йиллар давомида республиканинг ҳар бир ҳудудида ўрта бўғин кадрларини тайёрлайдиган 14 та «яшил» техникумлар фаолиятини йўлга қўйиш;

• 2030 йилгача республиканинг ҳар бир ҳудудидаги «яшил» техникумларда 10 000 нафар ўрта бўғин кадрларини тайёрлаш учун экологик таълим ва илмни янада ривожлантириш.

• 2026–2028 йилларда экология, атроф-муҳитни муҳофаза қилиш ва иқлим ўзгариши соҳасида илмий даража олган номзодлар сонини 150 нафаргача етказиш.

Мазкур қарорда кўрсатилган таълим муассасалари 2026/2027 ўқув йилидан «яшил» техникумлар сифатида қайта ташкил этилади ҳамда уларда ҳудуднинг экологик, ижтимоий ва иқтисодий шароитларидан келиб чиқиб, соҳалар учун ўрта бўғин кадрларини тайёрлаш тизими йўлга қўйилади.

«Яшил» техникумларнинг моддий-техника базасини яхшилаш ва таълим сифатини ошириш мақсадида улар Касбий таълим агентлиги билан келишув асосида Марказий Осиё атроф-муҳит ва иқлим ўзгаришини ўрганиш университети (Университет)га бириктирилади.