Америка Қўшма Штатлари ва Исроилнинг Эронга қарши ҳарбий операциясининг биринчи ҳафтаси Вашингтонга тахминан 6 миллиард долларга тушди, деб ёзмоқда “The New York Times”.

Газета маълумотига кўра, АҚШ мудофаа вазирлиги бу ҳафта Конгрессга дастлабки етти кундаги жанг харажатлари тахминан 6 миллиард доллар бўлганини билдирган. Маблағнинг қарийб 4 миллиарди ўқ-дориларга, жумладан ракеталарни ушлаб қолувчи тизимлар учун сарфланган.

Қайд этилишича, Теҳрондаги объектга берилган зарба урушнинг биринчи ҳафтасидаги вазиятнинг мураккаблигини кўрсатади: Қўшма Штатлар ва Исроилнинг заифлашган рақибга қарши ҳаводан кенг кўламли зарбалари давом этмоқда, аммо «якун» қандай бўлиши ҳақида аниқ жавоблар йўқ. Жанг бошланганидан буён коалиция кучлари Эрон ҳудудидаги позицияларга, жумладан баллистик ракеталар, ҳарбий штаблар ва денгиз кучлари объектларига қарийб тўрт мингта зарба берган.

Шу билан бирга, кенг кўламли ҳаво ҳужумларига қарамасдан, Эроннинг ҳарбий салоҳиятининг катта қисми сақланиб қолгани айтилмоқда. “The New York Times”нинг хабар беришича, америкалик расмийлар Конгрессга берган ёпиқ брифингларда Эрон ҳали ракеталар захирасининг тахминан ярмига ва дронларининг катта қисмига эга экани қайд этилган.

Ҳарбий операция бошланишини АҚШ ва Исроил томонлари олдини олувчи зарба ва Эроннинг ядровий дастури билан боғлиқ тахминий хавфлар билан изоҳлаган эди. Бироқ эндиликда улар очиқ айта бошлаганидек, мақсадлар орасида ҳокимият алмашуви масаласи ҳам кўриб чиқилмоқда.