Саудия Арабистонининг «Ал-Наср» клуби сардори Криштиану Роналду навбатдаги тур ўйинидан сўнг жиддий жароҳат олгани маълум бўлди. Бу ҳақда клуб матбуот хизмати хабар берди.

Кеча, 3 март куни эълон қилинган хабарда 41 ёшли португалиялик футболчи сон орқа мушак қисми (hamstring)дан жиддий жароҳат олгани ва ҳозирда у билан реабилитация дастури бошлангани расман тасдиқланган. Бироқ форварднинг қайтиш муддати ҳозирча очиқланмаган.

Роналду жорий йилнинг 28 февраль куни «Ал-Файҳа»га қарши ўйиннинг 12-дақиқасида пенальтини амалга ошира олмади. У учрашувнинг 81-дақиқасида мураббийлар штабига ишора бергач, Абдуллоҳ Ал-Ҳамдонга алмаштирилди ва майдонни ноқулай ҳолатда тарк этди. Баҳсда «Ал-Наср» ғалабага эришган бўлса-да, ушбу йўқотиш жамоа учун муҳим паллада содир бўлди — клуб Саудия Про-лигаси пешқадамлигини сақлаб қолишга интилмоқда.

Мавсумда 21 гол урган ва лиганинг энг яхши тўпурари бўлиб турган 41 ёшли ҳужумчининг март ойида «Неом СК» ва «Ал-Халиж»га қарши ўйинларда иштирок этиши сўроқ остида қолмоқда. Шунингдек, у Португалия терма жамоасининг Мексика ҳамда АҚШга қарши ўртоқлик баҳсларида майдонга тушиши ҳам номаълум.

Ушбу хабарлар фонида хавфсизликка оид миш-мишлар ҳам пайдо бўлган. Унга кўра, Ар-Риёддаги АҚШ элчихонасига дрон ҳужуми уюштирилганидан сўнг, Роналдуга тегишли хусусий самолёт тунги пайтда Мадридга учиб кетгани қайд этилган. Вазият бўйича турли сигналлар мухлисларни хавотирда қолдирмоқда.