Иллюстратив фото

Соғлом парҳезга риоя қилиш умрингизни яна бир неча йилга узайтириши мумкин. Бу хулосага Хитойнинг Хуачжун фан ва технология университети тадқиқотчилари Буюк Британия Биобанкидаги 100 000 дан ортиқ иштирокчиларнинг маълумотларини таҳлил қилганидан сўнг келишди.

Олимлар иштирокчиларнинг парҳезлари бешта тан олинган «соғлом» парҳез — Ўрта ер денгизи, DASH (қон босимини назорат қилиш учун), ўсимликлар асосидаги, диабет хавфини камайтириш учун парҳезлар ва Муқобил соғлом овқатланиш индексига қанчалик яқинлигини баҳоладилар. Олимлар ўн йилдан ортиқ вақт давом этган тадқиқотда овқатланиш одатлари, узоқ умр кўриш билан боғлиқ генетик хусусиятлар ва ўлим кўрсаткичларини таққосладилар.

Ҳисоб-китоблар шуни кўрсатдики, ушбу парҳезлардан бирига ўтиш 45 ёшли одамлар учун энг соғлом бўлмаган парҳезга нисбатан умр кўриш давомийлигини 2-4 йилга ошириши мумкин. Энг катта ўсиш Муқобил соғлом овқатланиш индекси билан боғлиқ бўлиб, у орқали эркаклар 4,3, аёллар эса 3,2 йилгача умрларини узайтириш мумкин экан. Ўрта ер денгизи парҳези ва диабетнинг олдини олишга қаратилган парҳез ҳам сезиларли ижобий натижага эга бўлган.

Тадқиқотда бутун донли маҳсулотлар, сабзавотлар ва мевалар узоқ умр кўриш билан энг изчил боғлиқликни кўрсатди. Муаллифлар соғлом овқатланишнинг фойдалари узоқ умр кўришга генетик мойилликдан қатъи назар сақланиб қолганлигини таъкидладилар, бу эса парҳезнинг ўзгартирилиши мумкин бўлган хавф омили сифатидаги муҳим ролини тасдиқлайди.