Самарқанд вилоятида сифати кафолатланмаган алкоголь маҳсулотларининг савдога чиқарилишининг олди олинди. Бу ҳақида Иқтисодий жиноятларга қарши курашиш департаменти хабар берди.

Унда айтилишича, Бош прокуратура ҳузуридаги Департаментнинг Оқдарё тумани бўлими ва бошқа ҳуқуқни муҳофаза қилувчи орган ходимлари ҳамкорлигида тезкор тадбир ўтказилган.

Маълум бўлишича, туман ҳудудида жойлашган «Т.С.» МЧЖ масъул шахслари «Ўзбекистон» МФЙ ҳудудидаги савдо дўкони ва омборхонасида умумий баҳоси 402,8 миллион сўмлик келиб чиқиши ва сифатини тасдиқловчи ҳужжатлари бўлмаган турли номдаги жами 9 минг 400 дона алкоголь маҳсулотларини ўтказиш мақсадида сақлаб келаётганликлари аниқланган.

Ушбу алкоголь маҳсулотлари тезкор тадбир ходимлари томонидан ашёвий далил сифатида расмийлаштириб олинган.

Ҳозирда мазкур ҳолат юзасидан Жиноят кодексининг 176-моддаси (қалбаки пул, акциз маркаси ёки қимматли қоғозлар ясаш, уларни ўтказиш) ва 186-1-моддаси (этил спирти, алкоголли маҳсулот ва тамаки маҳсулотини қонунга хилоф равишда муомалага киритиш ёки ишлаб чиқариш) билан жиноят иши қўзғатилиб, тергов ҳаракатлари ўтказилмоқда.