Андижон шаҳрида тадбиркорнинг фаолиятига тўсқинлик қилган солиқ органи мансабдор шахси 30 миллион сўм жаримага тортилди. Бу ҳақда Бизнес-омбудсман хабар берди.

Билдирилишича, Андижон шаҳрида фаолият юритувчи «А.Б.» МЧЖ раҳбари солиқ органи томонидан ўтказилган текширувдан ҳамда банкдаги ҳисобварақлари тўхтатиб турилганидан норози бўлиб Бизнес-омбудсманга мурожаат қилган.

Тадбиркорлик субъекти фаолиятида камерал солиқ текшируви ўтказилиб, банкдаги ҳисобварақлар бўйича операцияларни тўхтатиб туриш чоралари қўлланилган. Тадбиркор томонидан талабномага жавоб берилганига қарамасдан, тадбиркорнинг банкдаги ҳисобварақлар бўйича чекловлар ўз вақтида бекор қилинмаган.

Аниқланишича, солиқ органи мансабдор шахси томонидан тадбиркорлик субъектларининг банк ҳисобварақлари бўйича операцияларни қонунга хилоф равишда тўхтатиб туриш ҳамда камерал солиқ текшируви ўтказиш тартибларини бузиш ҳолатларига йўл қўйилган.

Ҳозирда мазкур ҳолат юзасидан мансабдор шахс Маъмурий жавобгарлик тўғрисидаги кодекснинг 241-2-моддаси ҳамда 241-3-моддаларига асосан маъмурий жавобгарликка тортилган.