Bitcoin нархи шанба куни кескин пасайиб, 78 минг доллардан ҳам паст даражага тушди. “Forbes”нинг ёзишича, бу ҳолат АҚШда фоиз ставкалари бўйича кутилмалар қайта кўриб чиқилаётгани ҳамда Президент Дональд Трамп томонидан Кевин Уоршнинг Федерал захира тизими раиси лавозимига номзод сифатида кўрсатилиши билан боғланмоқда.

30 январь, жума куни Bitcoin тахминан 84 минг доллар атрофида баҳоланган бўлса, шанба куни у кескин тушиб, 77 900 долларгача пасайди. Бу сўнгги 24 соат ичида 7 фоиздан ортиқ қиймат йўқотишни англатади. Мақола ёзилган пайтда эса курс 78 626 долларни кўрсатиб турган эди. Жорий даража 2024 йилда Дональд Трамп президент этиб сайланган даврда кузатилган кўрсаткичларга яқинлашди.

2025 йилнинг октябрь ойида Bitcoin энг юқори чўққисига чиқиб, 126 198 долларга етган эди. Аммо шундан сўнг инвесторлар хавфли активлардан чекина бошлагани, шунингдек, Федерал захира тизимининг фоиз ставкалари бўйича йўли ноаниқ бўлиб қолгани сабабли криптовалюта нархи асосан пасайиб борди.

Bitcoin билан бирга бутун криптовалюта бозори ҳам тушишни бошдан кечирмоқда. Coindesk маълумотларига кўра, сўнгги бир ҳафта ичида Ethereum, BNB, XRP ва Solana каби йирик токенлар камида 10 фоизга арзонлашган. Айни пайтда олтин нархи ҳафта бошида рекорд даража — 5 300 доллардан ошган бўлса-да, Уорш номзоди ҳақидаги хабарлардан сўнг у ҳам пасайишни бошлади. Бу АҚШ долларининг мустаҳкамланиши билан бир вақтга тўғри келди.

Таҳлилчиларнинг фикрича, Кевин Уоршнинг номзод сифатида илгари сурилиши криптовалюталар учун салбий омил бўлиши мумкин. 10x Research асосчиси Маркус Тиленга кўра, Уоршнинг қатъий пул-кредит сиёсати, юқори реал фоиз ставкалари ва ликвидликни чеклашга урғу бериши криптовалюталарни ҳимоя воситаси эмас, балки арзон пул сиёсати тугаганда қадрсизланадиган спекулятив актив сифатида намоён қилади. Фоиз ставкалари узоқ муддат юқори сақланиши кутилган шароитда инвесторлар одатда криптовалюта каби хавфли активлардан чиқиб, хавфсиз сармоя турларига ўтишади.