Вилоят шаҳар ва туманларида Янги йил даракчиси – байрам арчалари атрофида серзавқ томошалар бошланиб кетди. Улар орасида бўйи энг баланди Давлатободдаги “Афсоналар водийси тематик паркидан жой олган. Осмон сари 42 метрга “ўсган”, айланаси 20 метрга етадиган улкан арча 1600 тадан кўпроқ ўйинчоқлар билан безатилган. Уч қисмидаги икки метрли порлаб турган юлдузча тунда шаҳарнинг энг олис чеккаларида ҳам ялтираб кўзга ташланади.

— Боғимиз ҳозирданоқ Янги йилни орзиқиб кутаётган болажонларга тўляпти. Улар учун январнинг биринчи ўн кунлигида ҳам давом этадиган байрам дастури тайёрланган, — дейди парк иш бошқарувчиси Иномжон Мўйдинов. – Қорбобо ва Қорқиз иштирокидаги қувноқ ўйинлар, таниқли эстрада хонандаларининг чиқишлари, қизиқарли цирк томошалари барчага унутилмас лаҳзаларни ҳадя этиши табиий.

Айтиш лозимки, “Афсоналар водийси” эртакнамо манзаралари билан кишини ўзига ром этадиган маскан. Бу ердаги қатор аттракционлар, хусусан, 92 метр баландликка чўзилган томоша чархпалаги ҳамиша ташриф буюрувчилар билан гавжум.

Қудратилла НАЖМИДДИНОВ. “Халқ сўзи”.