Видеодан кадр

Самарқанд вилояти Тойлоқ туманида эркак у билан жанжаллашиб қолган танишларининг юк машинасига бензин сепиб, ёқиб юборди. Вилоят Ички ишлар бошқармаси ахборот хизмати ҳолат юзасидан маълумот берди.

Билдирилишича, жорий йилнинг 28 ноябрь куни соат 21:50 да Тойлоқ тумани «Беклар» маҳалласида яшовчи 1985 йилда туғилган фуқаро К.А. қўшни маҳаллада яшовчи, танишлари — 1990 йилда туғилган Ғ.Р. ва 1991 йилда туғилган Н.Р. билан ўрталарида юзага келган ўзаро келишмовчилик сабаб жанжаллашиб қолган.

Шундан сўнг, К.А. 20 ва 18 ёшли фарзандлари билан бирга бориб, Ғ.Р ва Н.Р. бошқарувида бўлган юк машиналарига бензин сепиб, ёқиб юборган.

Ёнғин зудлик билан бартараф этилиб, бошқа транспорт воситалари ва улардаги юкларга зарар етказилишининг олди олинган.

Қайд этилишича, мазкур ҳолат юзасидан 29 ноябрь куни Тойлоқ тумани ИИБ ҳузуридаги Тергов бўлинмаси томонидан Жиноят кодексининг 173-моддаси (Мулкни қасддан нобуд қилиш ёки унга зарар етказиш) 2-қисми билан жиноят иши қўзғатилиб, айбдор шахсларга нисбатан қамоққа олиш тарзидаги эҳтиёт чораси қўлланилган. Ҳозирда дастлабки тергов ҳаракатлари олиб борилмоқда.