Бош прокуратура ҳузуридаги Департаментнинг Тойлоқ тумани бўлими томонидан тезкор тадбир ўтказилди, деб хабар бермоқда Иқтисодий жиноятларга қарши курашиш департаменти.

Унда айтилишича, ўтказилган терговга қадар текширув давомида «М.С.» фермер хўжалиги иш бошқарувчиси фуқаро А.Н. ва бошқалар тижорат мақсадида умумий фойдаланишдаги электр тармоғига сув насосларини яширинча улаб, жами 452,1 миллион сўмлик электр энергиясидан ноқонуний фойдалангани фош қилинган.

Шу каби яна бир ҳолат, департаментнинг Олтинкўл тумани бўлими ходимлари томонидан ўтказилган тезкор тадбирда ҳам аниқланган.

Унга кўра, «А.С.» хусусий корхонаси раҳбари фуқаро Ж.Н. «Иттифоқ-Гулбоғ» МФЙ ҳудудидаги нотурар бинода тижорат мақсадида табиий газ тармоғига ўзбошимчалик билан уланиб, 163,1 миллион сўмлик табиий газдан ноқонуний фойдаланиб келгани маълум бўлган.

Бундан ташқари, департаментнинг Чортоқ тумани бўлими томонидан ўтказилган терговга қадар текширувда фуқаро Н.А. нотурар-жой биносида тижорат мақсадида умумий фойдаланишдаги электр тармоғига сув насоси ва бошқа электр жиҳозларини ҳисоблагичдан ташқари улаб, 130,8 миллион сўмлик электр энергиясидан ноқонуний фойдалангани аниқланган.

Ҳозирда мазкур ҳолатлар юзасидан Жиноят кодексининг 169-моддаси (ўғрилик) билан жиноят ишлари қўзғатилиб, тергов ҳаракатлари бошлаб юборилган.