Foto: “Xalq soʻzi”

Oqdaryo tumanining Goʻzalkent mahallasidagi 9-maktabgacha taʼlim tashkilotining zamonaviy qiyofada qurilgan yangi binosi foydalanishga topshirildi.

90 oʻringa moʻljallangan mazkur obyekt mahallada istiqomat qiluvchi aholi, ayniqsa bolajonlar uchun yangi yil bayramiga ajoyib sovgʻa boʻldi.

Mazkur maktabgacha taʼlim tashkilotining eski binosi past quvvatda boʻlib, bu yerdagi sharoit ham qoniqarsiz edi. Investitsiya dasturi asosida 4,2 milliard soʻm mablagʻ evaziga yangidan qurilib, foydalanishga topshirilgan ushbu binoda bolajonlar uchun ham tarbiyachilar uchun ham barcha zarur shart-sharoitlar yaratilgan.

Binoning ochilish marosimida ishtirok etgan tuman hokimligi, nuroniylar va mahalla faollari ushbu quvonchli kun bilan barchani qutlab, yurtimizda yoshlar taʼlim-tarbiyasiga qaratilayotgan eʼtibor haqida soʻz yuritdi.

Shundan soʻng jamoatchilik vakillari binoda bolajonlar uchun yaratilgan sharoitlar bilan tanishishdi.

Shu oʻrinda aytish kerakki, Oqdaryo tumanida 205 ta MTT mavjud boʻlib, shundan 30 tasi davlat, 164 tasi oilaviy va 11 tasi davlat xususiy sheriklik asosidagi bogʻchalardir. Tumanda 3-7 yoshdagi bolalar soni 14656 nafarni tashkil qiladi. Shundan 12271 nafari MTTlarga qamrab olingan. Qamrov darajasi esa 83,7 foizni tashkil qilmoqda.

Abdulaziz YOʻLDOSHEV, “Xalq soʻzi”.